АКАФИСТ СВЯТОМУ АВРААМИЮ РОСТОВСКОМУ ЧУДОТВОРЦУ
Ака́фист (греч. Ο Ακάθιστος Ύμνος, также неседа́лен, неседа́льная песнь, то есть «песнь, которую поют, не садясь, стоя») — жанр православной церковной гимнографии, представляющий собой хвалебно-благодарственное пение, посвящённое Господу Богу, Богородице, ангелу или (чаще всего) тому или иному святому. В отличие от древних кондаков, содержит хайретизмы (ряд восхвалений, начинающихся со слова Радуйся).
Рака со святыми мощами прп. Авраамия, к которым притекали многочисленные богомольцы, со времен построения царем Иоанном Грозным каменного Богоявленского храма, находилась в приделе прп. Авраамия, вплоть до начала XX века.
26 апреля 1920 года святые мощи прп. Авраамия и мощи прп. Евфросинии Полоцкой, привезенные из Полоцка в 1915 году, были вскрыты и осквернены.
Местная пресса оценивала эту акцию как «крупную победу» и «удар по старой религии». Но как писал в своем дневнике современник этих событий С.А. Соколов: «Вскрытие мощей произвело совершенно обратное впечатление на население, чем предполагалось советской властью. Мощи остались открытыми целую неделю, и всю эту неделю люди ходили к ним на поклонение. По окончании поклонения мощи были убраны обратно в раки и снова закрыты».
В 1922 с обеих рак были сняты серебряные оклады и оставлены лишь деревянные корпуса, в которых они оставались на своем месте вплоть до 1929 года, пока Богоявленский собор не перешел в ведение Ростовского музея. С этого времени святые мощи вместе с ракой были перенесены в Ростовский музей.
До 1941 года мощи прп. Авраамия находились в экспозиции антирелигиозной выставки. После Великой Отечественной войны выставка была расформирована, а мощи отправлены в фонды музея.
Только в 1991 году святые мощи были перенесены в возрождающийся Спасо-Яковлевский Димитриев монастырь, а 29 июля 2012 года вернулись в родную обитель — Авраамиев Богоявленский монастырь, ныне АБЖМ — Авраамиев Богоявленский женский монастырь.
Акафист преподобному отцу нашему Аврамию архимандриту, Ростовскому чудотворцу.
Кондак 1.
Возбранный воеводо духовных воинов, ратующих под знаменем креста Христова на невидимыя сопостаты, преподобне отче Аврамие, похвальная восписуем ти мы чада твои: Ты же яко имеяй дерзновение к непобедимому Царю сил Христу Богу нашему, пособствуй нам избавитися от наветов видимых и невидимых враг, да зовем ти: Радуйся, преподобне отче Аврамие, Ростовский чудотворче.
Икос 1.
Ангела образом, земнаго естеством суща, яви тя граду Ростову Царь ангелов, провидев бо иногда скорое твое от идолослужения к Нему обращение, непостижимым образом призва тя из тмы в чудный свой свет. Нас же, величающих неисповедимую благость Его, научи вопити тебе таковая: Радуйся, от утробы матери Богом Отцем избранный. Радуйся, последи благоволением Бога Сына от нечестия ко благочестию с юности призванный. Радуйся, пламенную любовь ко Христу во всем животе своем явивый. Радуйся, ангельское житие до конца возлюбивый. Радуйся, языческаго нечестия ревностный изобличителю. Радуйся, христианския веры добрый учителю. Радуйся, преподобне отче Аврамие, Ростовский чудотворче.
Кондак 2.
Видяше родители твои тебе, преподобне, на долзе времени в лютом разслаблении суща, недоумевахуся: обаче прелестию многобожия зело ослеплени бывше, не возжелаша обратитися к единому истинному Богу, подающему всем страждущим скорое исцеление, и вкупе с тобою воспевати: Аллилуиа.
Икос 2.
Разум недоразумеваемый о несозданном Божестве уразумел еси, преподобне, от благочестивых Новаграда Пскова жителей, подругов отца твоего, и слышав от оных о таинствах христианския веры, положил еси во уме обратитися ко Господу и последовати Его учению. Темже мы, чудящеся скорому твоему на лучшая преложению, дерзаем восхвалити тя таковыми гласы: Радуйся, земле благая, приявшая семя небеснаго учения. Радуйся, свыше удостоивыйся Божественнаго просвещения. Радуйся, ниво, произрастившая клас живыя веры. Радуйся, сосуде, исполненный благодати обильно. Радуйся, крине, возникший посреде терния. Радуйся, звездо, возсиявшая во тме языческаго нечестия. Радуйся, преподобне отче Аврамие, Ростовский чудотворче.
Кондак 3.
Сила Вышняго внезапу найде на тя, преподобне, и во мгновение ока стягну разслабленный состав тела твоего. Ты же востав от одра твоего, яко николиже болевый, в радости неизглаголанней, благодаря безмезднаго врача своего, Егоже прежде не ведел еси, Иисус Христа, и возопил еси Ему: Аллилуиа.
Икос 3.
Имея помышление в сердце своем, еже служити Христу, даровавшему ти исцеление, отай изшел еси из дому родителей своих, и пришед в пределы Великаго Новаграда, прилепился еси к жителям тоя страны, и с ними в простоте сердца Христа Господа прославлял еси. Темже вси видевше благое твое изволение, ублажаху тя сицевыми гласы: Радуйся, дом и родителей своих Господа ради оставивый. Радуйся, в неведомую ти страну взыскание спасения путь свой направивый. Радуйся, богатство земное ни во что же вменивый. Радуйся, нищету паче богатства возлюбивый. Радуйся, образе жизни духовныя. Радуйся, свет, возсиявый из тмы греховныя. Радуйся, преподобне отче Аврамие, Ростовский чудотворче.
Кондак 4.
Буря недоумения смущает тя, преподобне, како бы получити знамение Христианския веры; еще бо не крещен был еси. Бог же всякия утехи тайным промыслом приведе тя во обитель иночествующих, яже есть на Валааме, да ту отродишися водою и Духом, и в чистоте сердца посреде лика иночествующих воспеваеши ему: Аллилуиа.
Икос 4.
Слыша игумен Феогност и братия его о пришествии твоем во обитель их, преблаженне, призваша тя пред себя, и видевше тя мужа благоприятна и смысленна, прияша с радостию, и крестивше во имя Отца и Сына и Святаго Духа, и причтоша к лику своему. Мы же промыслу Божию, на тебе явленному удивляющеся, восхваляем тя сице: Радуйся, святым крещением во обители иночествующих просвещенный. Радуйся, во святом крещении дарами Святаго Духа исполненный. Радуйся, по крещении образ иноческий на ся приемый. Радуйся, иго благое по Евангелию на рамо свое вземый. Радуйся, яко усердно последовал еси стопам Христовым. Радуйся, яко на все подвиги иноческия явился еси готовым. Радуйся, преподобне отче Аврамие, Ростовский чудотворче.
Кондак 5.
Боготечная звезда явился еси отче Аврамие, от Валаама возникшая, и в пределех града Ростова возсиявшая. Ты бо не терпя славы и похвалы человеческия, умыслил еси сокрытися в неведомыя страны, и пришед в Чудский конец, вселился еси при езере Неро в пусте месте близ бездушнаго идола Велеса, и в тишине душевней воспевал еси Богу: Аллилуиа.
Икос 5.
Видевше Богоразумнии и Богобоязненнии людие, елицы в то время во граде Ростове беша, уединенное и благочестивое твое житие о Бозе, зело любляху тя, и попремногу чествоваху. Темже и от нас приими похвалы сицевыя: Радуйся, возлюбивый уединенное житие о Бозе в пустыне. Радуйся, подражавый древним пустынножителям во всякой святыне. Радуйся, на твердем камени веры утвердивый твою ногу. Радуйся, послуживый с пламенным усердием Господеви Богу. Радуйся, яко в посте и молитвах пребывал еси выну. Радуйся, яко в непрестанном бдении и Богохвалении уподобился еси безплотных чину. Радуйся, преподобне отче Аврамие, Ростовский чудотворче.
Кондак 6.
Проповедует град Ростов великия твоя труды и подвиги, яже ты подъял еси, искореняя в нем языческое нечестие, и в сердцах ожесточенных идолопоклонников, семена христианския веры и благочестия насаждая, едино имея желание, да всех привлечеши ко Христу, и научиши вкупе с тобою воспевати Ему: Аллилуиа.
Икос 6.
Возсия паче солнца благочестивое и богоугодное житие твое, всехвальне отче Аврамие, и якоже звезды небесныя, просветишася добродетели твоя на земли. О них же и мы, благодаряще Христа Бога, давшаго ти таковую благодать свою, восхваляем тя сице: Радуйся, звездо, во тме греховней заблуждшым светящая. Радуйся, лествице, по степенем добродетелей к небеси возводящая. Радуйся, ангельское житие всем являяй. Радуйся, страсти греховныя в человецех уставляяй. Радуйся, образе истиннаго смирения. Радуйся, зерцало совершеннаго самоотвержения. Радуйся, преподобне отче Аврамие, Ростовский чудотворче.
Кондак 7.
Хотя преблагий Христос Бог утешити тя в скорби твоей, юже имел еси по людех в зловерии язычестем погибающих, терпеливе Аврамие, послал на помощь к тебе возлюбленнаго ученика Своего Иоанна Богослова, яко да вооружит тя к низложению злоковарственнаго идола Велеса, да оттоле безпечален пребудеши, и в дерзновении мнозе воспеваеши Ему: Аллилуиа.
Икос 7.
Новаго тя Николая Мирликийскаго вемы, богоносе отче Аврамие, якоже бо той ревностию Божественною распалаем, разсыпа до основания Артемидину кумирницу, яже в велицей чести бяше у Едесских идолослужителей. Сице и ты бездушнаго идола Велеса, от древних ростовцев чествованнаго, сокрушил еси. Сего ради по достоянию приими от нас похвалы сия: Радуйся, сподобивыйся быти собеседник святому Богослову. Радуйся, приемый от него с жезлом благодать и силу Христову. Радуйся, яко сим жезлом сокрушил еси идола Велеса. Радуйся, яко вельми посрамил еси жившаго в том вселукаваго беса. Радуйся, яко на том месте воздвигнул еси храм Господеви Богу и обитель прекрасну. Радуйся, яко по сем в сладости душевней воспел еси вкупе с верующими песнь Богослову. Радуйся, преподобне отче Аврамие, Ростовский чудотворче.
Кондак 8.
Странное чудо видевше благовернии князие, пришедшии по обычаю прияти от тебе благословение, не бывшу ти в храмине твоей, дым изшед из умывальницы твоея, черн и смраден зело, ужасошася. Ты же прозрев злоковарнаго узника освобождение, и вскоре пришед, поучил еси князей опасно блюсти себе от козней вражиих, и вкупе с ними возопил еси Богу: Аллилуиа.
Икос 8.
Весь, вся, всем был еси воистинну, достохвальне отче Аврамие, и ко всем равно горел еси нелицемерною любовию. А якоже в животе твоем, тако и ныне с верою к тебе прибегающих, защищаеши и сохраняеши от всякаго зла. Убо достойне приемлеши от всех похвалы сицевыя: Радуйся, служителю Божий, о грешных умоляяй. Радуйся, наставниче, верных к небеси направляяй. Радуйся, бедствующих многомощный хранителю. Радуйся, оскорбляемых теплый покровителю. Радуйся, посетителю скорый в немощех лежащих. Радуйся, утешителю благий в бедах слезящих. Радуйся, преподобне отче Аврамие, Ростовский чудотворче.
Кондак 9.
Всякое естество ангельское удивися великому твоему смирению и незлобию, достоблаженне Аврамие, егда ты, по навету всезлобнаго врага, представлен был еси во единей худей власянице к великому князю Владимиру, в позор и посмеяние всем видевшим тя. Ты же нимало небрегл еси о таковом уничижении и поругании, но паче диавола посрамил еси. Чесо ради с великою честию во обитель твою возвратился еси, нося мир и благословение чадом твоим, и в восхищении духа посреде их принесл еси песнь Богу: Аллилуиа.
Икос 9.
Витийствующий язык не может достойно восхвалити тя, всякую славу превосходяй, преславне отче Аврамие; многая бо и преславная в животе твоем соделал еси: ныне же во свете живый неприступнем, таяжде или еще вящшая силою Божиею содеваеши чудеса. Темже и мы любовию к тебе подвизаеми, дерзаем восхвалити тя сице: Радуйся, возшедый в горний град Вседержителя. Радуйся, вознесыйся в прекрасный рай Вышняго Насадителя. Радуйся, яко святая твоя душа ныне в пресветлом Сионе вселяется. Радуйся, яко и тело твое нетлением во обители твоей прославляется. Радуйся, теплый наш предстателю ко Христу Богу. Радуйся, низпосылаяй нам дольним от Него благодать премногу. Радуйся, преподобне отче Аврамие, Ростовский чудотворче.
Кондак 10.
Спасти хотя душу Гермогена некоего, по действу диаволю в сомнение во святости жития твоего впадшаго, досточудне Аврамие, вмале на неколико дней наказал еси его, но паки за молитвы святых отец обители твоея помиловал еси. Он же познав свое согрешение, прослави тебе, незлобиваго благодетеля, и Богу тобою чудодействующему возопи: Аллилуиа.
Икос 10.
Стена граду Ростову ты еси, чудотворче святый, и всем восхваляющим достоблаженное житие твое надежда несомненная. Темже и нас, добродетельми убогих, от недугов и нужд различных свобождаяй, вопиющих к тебе таковая: Радуйся, стено нерушимая остеняемаго тобою нашего града. Радуйся, забрало собраннаго тобою духовных овец стада. Радуйся, во правоверии стоящих незыблемое утверждение. Радуйся, во благочестии ходящих крепкое ограждение. Радуйся, поборниче крепкий ведущим брань с духами злобы поднебесных. Радуйся, вождю премудрый шествующим к небеси прискорбный и тесный путь. Радуйся, преподобне отче Аврамие, Ростовский чудотворче.
Кондак 11.
Пение всякое не довлеет к похвале твоей, прехвальне отче Аврамие, кто бо от человек возможет по достоянию прославити жестокое житие твое; кто возвеличит многотрудныя твоя подвиги; за ня же сподобился еси со всеми праведными духи, богоугодно в телесех своих подвизавшимися, на небесех жити и воспевати Христу Богу: Аллилуиа.
Икос 11.
Светозарное светило, не точию град Ростов озаряющее, но и вся грады и веси страны православнаго Российскаго царства просвещающее зрим Тя светоявленне отче Аврамие, с невещественными бо ангельскими светы предстоя Троичному несозданному свету, и от Него же Божественными лучами осияваем, облиставаеши верных, вопиющих ти сице: Радуйся, светильниче, добродетельми светящий. Радуйся, молитвами твоими нас ограждающий. Радуйся, свете плавающих в житейстем мори освещаяй. Радуйся, светением твоим безбедно преплывати от мира к небеси направляяй. Радуйся, святынею твоею град наш прославляяй. Радуйся, чудесы твоими вся концы земли озаряяй. Радуйся, преподобне отче Аврамие, Ростовский чудотворче.
Кондак 12.
Благодать данную ти от Бога сведуще, прославляем прославльшаго и возвеличившаго тя Господа, и на твое мощное к Нему предстательство надеющеся, умильно взываем к тебе, чудотворче святый: моли неисповедимую благость Его, яко да избавит нас недостойных рабов Своих от искушений и насилий вражиих, и всякаго греха, да прелести его избавлшеся, чистым сердцем и нескверными устами воспеваем Ему: Аллилуиа.
Икос 12.
Поюще твое честное преставление, чтим радостно по долгу память твою, и к твоему целбоносному гробу припадающе, изливаем сердца наши во благодарениих пред тобою, яко и по преставлении твоем нас не оставляеши, но милостию своею выну призираеши, посещаеши и заступаеши, обаче и устнами дерзаем восхвалити тя сице: Радуйся, прерадостно от обители твоея преселивыйся на гору небесную. Радуйся, совокупивыйся тамо лику избранных Божиих. Радуйся, яко в сонме их предстоиши дивному во святых Господу. Радуйся, яко лицем к лицу зриши неизреченную славу Его. Радуйся, яко тело твое святое нетленное оставил еси на земли. Радуйся, яко тем возвеличил еси обитель твою и град Ростов. Радуйся, преподобне отче Аврамие, Ростовский чудотворче.
Кондак 13.
О преподобне и преблаженне отче наш Аврамие, светильниче града Ростова! Нынешнее наше приими приношение и пролей теплую молитву ко Господу, яко да сохранит достояние Свое православную Русскую землю, да избавит от врагов видимых и невидимых, от нашествия иноплеменных, от недуга и глада, от всякия скорби и смертоносныя язвы, и будущия нас свободит муки, вопиющих к нему: Аллилуиа.
Сей кондак глаголи трижды. Таже икос 1-й, Ангела образом: и кондак 1-й, Возбранный воеводо:
Молитва преподобному Аврамию Ростовскому чудотворцу.
О преподобне отче наш Аврамие! Не забуди нас, но поминай всегда во святых своих благоприятных молитвах к Богу. Помяни стадо твое, еже сам пасл еси, и не забуди посещати чада твоя, и моли за ны, отче священный, яко имея дерзновение ко Господу: не мним бо тя мертва суща, аще и преставился еси от нас, пастырю наш добрый! Се мощи твоя святыя пред очима нашима, святая же твоя душа со ангельскими безплотных лики у престола всех Царя предстоящи, достойно веселится. Испроси убо нам время на покаяние, еже невозбранно преити от земли на небо, и вечныя муки избавитися, и небеснаго Царствия наследниками быти со всеми праведными, от века благоугодившими Господу нашему Иисусу Христу. Емуже подобает всякая слава, честь и поклонение со Отцем и Святым Духом, ныне и присно, и во веки веков. Аминь.
Частые поисковые слова, как заказать требы через сайт:
заказать требы онлайн
заказать требы в монастыре через интернет
заказать требы в монастыре
записка требы
заказать требы на афоне официальный сайт
заказать требы в Новгороде
Заказать требы, записки на поминание через сайт
заказать сорокоуст
требы онлайн
заказать молебен
заказать неусыпаемую псалтырь
заказать требы в монастыре через интернет
заказать требы в Москве
цены на записки требы, самые низкие цены на требы
Акафист 2.
Конда́к 1.
Избра́нный страстоте́рпче Христо́в и чудотво́рче преди́вный, во страда́нии твое́м вене́ц прие́мый от руки́ Вседержи́теля и со а́нгелы предстоя́й Его́ престо́лу, пе́сньми восхваля́ем тя́ любо́вию и мо́лим ти́ ся́, моли́твами твои́ми от вся́ких бе́д и скорбе́й свобожда́й на́с, тебе́ зову́щих:
Ра́дуйся, му́чениче и чудотво́рче Авраа́мие.
И́кос 1.
А́нгелов сожи́тель и челове́ков засту́пник вои́стину яви́лся еси́, му́чениче достохва́льне, благоволе́нием все́х Творца́ Христа́ Бо́га, Его́же возлюби́л еси́ и за Него́ же пострада́л еси́ да́же до кро́ве во испове́дании непоколеби́мем. Те́мже приими́ от на́с сия́ хвале́ния:
Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.
Ра́дуйся, злове́рия магоме́това обличи́телю; ра́дуйся, ве́ры христиа́нския небоя́зненный пропове́дниче.
Ра́дуйся, Ева́нгельскаго уче́ния до́брый послу́шателю; ра́дуйся, зако́на Госпо́дня тепле́йший храни́телю.
Ра́дуйся, ку́плю вре́менную премени́вый на стяжа́ние ве́чное небе́сное; ра́дуйся, ве́ры Христо́вы би́сер многоце́нен стяжа́вый.
Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.
Ра́дуйся, яви́выйся доброде́телей жили́ще, преукра́шенное чистото́ю; ра́дуйся, Ду́ха Свята́го оби́тель прекра́сная.
Ра́дуйся, му́чениче и чудотво́рче Авраа́мие.
Конда́к 2.
Ви́дя Христо́с Госпо́дь ду́шу твою́, ко прия́тию се́мени сло́ва Бо́жия чистото́ю и ми́лостынею предугото́ванную, све́том позна́ния Своего́ просвети́ тя́, блаже́нне, я́ко Корни́лия со́тника дре́вле, та́ко и твоя́ доброде́тели преждебы́вшия помяну́в любоблагоутро́бно, спаса́емых ча́сти сотвори́ тя́ о́бщника в Небе́снем Ца́рствии, иде́же со а́нгелы пое́ши Пресвяте́й Тро́ице пе́снь: Аллилу́иа.
И́кос 2.
Ра́зум богопросвеще́нный дарова́ся тебе́, Авраа́мие, и́мже я́сно проразуме́л еси́ тщету́ душепа́губную злове́рия магоме́това, и о́наго уклони́тися, Христа́ же взыска́ти потща́лся еси́ вседу́шно; те́мже взыва́ем ти́:
Ра́дуйся, блаже́нный после́дователю Христо́в; ра́дуйся, люби́телю за́поведей Его́ преи́скренний.
Ра́дуйся, кри́не благоуха́нный рая́ превы́шняго; ра́дуйся, цве́те прекра́сный вертогра́да Иису́сова.
Ра́дуйся, бога́тство земно́е ни во что́ же вмени́вый; ра́дуйся, стяжа́ния тле́нная презре́вый.
Ра́дуйся, ни́щия удовли́вый; ра́дуйся, рука́ми убо́гих сокро́вища твоя́ горе́ предпосла́вый.
Ра́дуйся, я́ко не уклони́лся еси́ в се́ть лихоима́ния; ра́дуйся, я́ко неулови́м пребы́л еси́ мре́жею сребролю́бия.
Ра́дуйся, му́дрый купе́ц Ца́рствия Небе́снаго; ра́дуйся, ве́рный ра́бе, да́нный тебе́ мна́с усугу́бивый.
Ра́дуйся, му́чениче и чудотво́рче Авраа́мие.
Конда́к 3.
Си́ла Вы́шняго укрепи́ тя́ на по́двиг страда́льческий, му́чениче святы́й Авраа́мие; не терпя́ бо ви́дети па́губу ду́ш челове́ческих, ре́вностию разже́глся еси́ по Бо́зе жи́ве, и ста́в посреде́ то́ржища, небоя́зненно обличи́л еси́ магоме́тову пре́лесть, поуча́я собра́тий твои́х благоче́стно ве́ровати во Христа́, за Него́ же и страда́ти не уклони́лся еси́, зовы́й: Аллилу́иа.
И́кос 3.
Име́я злове́рием потемне́нныя ду́ши, не восхоте́ша бо́лгаре прини́кнути в ра́зум слове́с твои́х боже́ственных, но ру́це уби́йственныя на тя́ возложи́вше, бие́нием лю́тым содробля́ху твоя́ соста́вы. Мы́ же, ублажа́я страда́ния твоя́, глаго́лем:
Ра́дуйся, Христа́ вседу́шно возлюби́вый; ра́дуйся, любо́вь к Нему́ я́звами, за Него́ подъя́тыми, яви́вый.
Ра́дуйся, апо́столом поревнова́вый; ра́дуйся, орга́н Свята́го Ду́ха бы́вый.
Ра́дуйся, благове́стия Ева́нгельскаго уста́ благоглаго́ливая; ра́дуйся, словеса́ жи́зни ве́чныя провеща́яй.
Ра́дуйся, бие́ние лю́тое за пресла́дкаго ти́ Иису́са сла́дце претерпе́вый; ра́дуйся, поруга́ние и досажде́ние за Него́ благоду́шно восприя́вый.
Ра́дуйся, я́ко во испове́дании Христо́ве непоколеби́м пребы́л еси́; ра́дуйся, я́ко ласка́ньми и прельще́ньми непрекло́нен яви́лся еси́.
Ра́дуйся, страстоте́рпче, в му́жестве неодоле́нный; ра́дуйся, добропобе́дниче, в терпе́нии непрело́жный.
Ра́дуйся, му́чениче и чудотво́рче Авраа́мие.
Конда́к 4.
Бу́рею зло́бы ды́шуще, нечести́вии бо́лгаре терза́ху тя́, я́ко а́гнца незло́бива зве́рие ди́вии, покуша́яся му́ками отврати́ти тя́ от Христа́ ко своему́ нече́стию; но ничто́же успе́ша потемне́ннии, си́лою бо свы́ше укрепля́емь, посрами́л еси́ о́ных ухищре́ние, посреде́ муче́ний немо́лчно испове́дуя Христа́, еди́наго Творца́ и Бо́га, и вопия́ Ему́: Аллилу́иа.
И́кос 4.
Слы́шав увеща́тельныя твоя́ глаго́лы, мучи́телие твои́, а́спидом глухи́м уподо́бльшеся, сугу́быми ра́нами уязвля́ху те́ло твое́ многотерпели́вое, Авраа́мие свя́те, я́ко не бы́ти на не́м ме́ста це́ла и неуя́звлена. Дивя́щеся у́бо вели́честву терпе́ния твоего́, зове́м ти́:
Ра́дуйся, учи́телю благоче́стия; ра́дуйся, посрами́телю нече́стия.
Ра́дуйся, ра́нами, я́ко у́тварьми многоце́нными укра́шенный; ра́дуйся, кро́вию твое́ю, я́ко багряни́цею, оде́янный.
Ра́дуйся, всесожже́ние ту́чное себе́ Христу́ прине́сший; ра́дуйся, за прелюбе́знаго ти́ Иису́са ду́шу положи́вый.
Ра́дуйся, страда́нием сочета́выйся Христу́, ра́ди на́шего спасе́ния распя́тому; ра́дуйся, ликовству́яй в черто́зе небе́снаго Домовлады́ки.
Ра́дуйся, у Престо́ла Бо́жия предстоя́й с го́рними си́лами; ра́дуйся, открове́нным лице́м созерца́яй сла́ву Трисия́ннаго Божества́.
Ра́дуйся, от ра́йских высо́т приника́яй благосе́рдием твои́м к на́м земноро́дным; ра́дуйся, спаса́яй от бе́д ве́ру и любо́вь к тебе́ иму́щих.
Ра́дуйся, му́чениче и чудотво́рче Авраа́мие.
Конда́к 5.
Богому́дрым пропове́дником апо́столом, за и́мя Христо́во ра́ны ра́достно прие́мшим, подража́л еси́ во страда́нии твое́м, Авраа́мие, вопия́ сопроти́в му́чащих тя́: Христа́ чту́, Его́ еди́наго люблю́ и умре́ти за Него́ преи́скренне жела́ю, да и с Ни́м живу́ во ве́ки, зовы́й: Аллилу́иа.
И́кос 5.
Ви́девше тя́, злочести́вии мучи́телие бо́лгаре, непрекло́нна и непобеди́ма испове́дника Христо́ва, пе́рвее ру́це и но́зе твои́ отсеко́ша, та́же и главу́ твою́ честну́ю мече́м отъя́ша, и та́ко до́блестно тече́ние твое́ сконча́в, преше́л еси́ к оби́телем небе́сным, от на́с же земны́х слы́шиши похвалы́ сия́:
Ра́дуйся, испове́дниче Христо́в непобеди́мый; ра́дуйся, адама́нте терпе́ния крепча́йший.
Ра́дуйся, но́вый му́чениче, дре́вним вели́ким му́чеником равноче́стне; ра́дуйся, пресла́вный венцено́сче, горе́ увенча́нный.
Ра́дуйся, чудотворе́ния благода́тию от Го́спода обогаще́нный; ра́дуйся, целе́б пода́телю всеблаги́й.
Ра́дуйся, во благоуха́нии святы́ни почива́яй; ра́дуйся, арома́ты ра́йскими облагоуха́яй ду́ши ве́рных.
Ра́дуйся, исто́чниче даро́в многоразли́чных; ра́дуйся, реко́ приснотеку́щая чуде́с.
Ра́дуйся, милосе́рдия к стра́ждущим сокро́вище неистощи́мое; ра́дуйся, боля́щих врачевство́ неоску́дное.
Ра́дуйся, му́чениче и чудотво́рче Авраа́мие.
Конда́к 6.
Пропове́стся в стране́ Росси́йстей до́блесть по́двига твоего́ страда́льческаго, му́чениче всехва́льный; те́мже слы́шав твою́ кончи́ну сла́вную и чудотворе́ний твои́х благода́ть, благове́рный вели́кий кня́зь Гео́ргий восхоте́ стяжа́ти тя́ засту́пника сто́льному гра́ду своему́ Влади́миру, в о́нь же мо́щи твоя́ от бо́лгар принести́ потща́ся, зовы́й венча́ющему му́ченики Христу́ Бо́гу: Аллилу́иа.
И́кос 6.
Возсия́л еси́ пресла́вно чудотворе́ния луча́ми, по пренесе́нии моще́й твои́х честны́х, Авраа́мие свя́те, во гра́д Влади́мир, и́же о́ными све́тло красу́ется, я́ко сокро́вищем многоце́нным; мы́ же, чту́щии тя́, ра́ку твою́ многоцеле́бную любе́зне обстоя́ще, зове́м ти́:
Ра́дуйся, гра́да на́шего похвало́ и утвержде́ние; ра́дуйся, оби́тели Богома́терния, в не́йже почива́еши, при́сное заступле́ние.
Ра́дуйся, подвиза́ющимся в не́й благода́тное вспоможе́ние; ра́дуйся, о́ных покро́ве и защище́ние.
Ра́дуйся, неду́гующих ско́ро предста́тельный целе́бниче; ра́дуйся, уныва́ющих благонаде́жное возбужде́ние.
Ра́дуйся, скорбя́щих всежела́тельное утеше́ние; ра́дуйся, ни́щих изоби́льное бога́тство.
Ра́дуйся, боля́щих младе́нцев исцеле́ние; ра́дуйся, изнемога́ющих укрепле́ние.
Ра́дуйся, ревну́ющих о благоче́стии помо́щниче; ра́дуйся, пребыва́ющих в посте́ и моли́тве споспе́шниче.
Ра́дуйся, му́чениче и чудотво́рче Авраа́мие.
Конда́к 7.
Хотя́ человеколю́бец Госпо́дь яви́ти щедро́т Свои́х оби́лие стране́ Росси́йстей, дарова́ на́м тебе́ страстоте́рпца но́ваго и моли́твенника богоприя́тнаго, чуде́с благода́ть источа́юща и неду́жных безме́здно врачу́юща; те́мже благодари́м тобо́ю благоде́ющаго на́м Го́спода и све́тло пра́зднуем честны́х моще́й твои́х пренесе́ние, к ни́м с любо́вию припа́дающе и Христу́ зову́ще: Аллилу́иа.
И́кос 7.
Но́ваго тя́ му́ченика и до́бляго страда́льца, Христо́ва испове́дника и чудотво́рца сла́внаго, любо́вию ублажа́ем, и ра́дующеся о твое́м к на́м прише́ствии, глаго́лем:
Ра́дуйся, денни́це лучеза́рная, от бо́лгар во Влади́мир гра́д прите́кшая; ра́дуйся, лучу́ немерца́ющий со́лнца пра́вды Христа́.
Ра́дуйся, уго́дниче Госпо́день, преди́вный в чудесе́х; ра́дуйся, пра́ведниче, просла́вленный на небеси́ и на земли́.
Ра́дуйся, нетле́нием моще́й твои́х в и́стине воскресе́ния ме́ртвых уверя́яй; ра́дуйся, о́браз безсме́ртия в сме́ртнем телеси́ показу́яй.
Ра́дуйся, я́ко тебе́ дана́ бы́сть благода́ть за ны́ моли́тися и возбужда́ти на́с ко благи́м дело́м; ра́дуйся, я́ко и по преставле́нии твое́м благодея́ние тре́бующим подава́еши.
Ра́дуйся, от смертоно́сных я́зв и боле́зней притека́ющих к тебе́ сохраня́яй; ра́дуйся, бе́дствующим и оби́димым помога́яй.
Ра́дуйся, боголюби́вых ду́ш непосты́дное упова́ние; ра́дуйся, лю́бящих тя́ при́сное утеше́ние.
Ра́дуйся, му́чениче и чудотво́рче Авраа́мие.
Конда́к 8.
Стра́нно е́сть ви́дети ме́ртвенное те́ло, жи́знь присносу́щную явля́ющее, во гро́бе лежа́щее и неду́ги врачу́ющее; но, му́чениче Христо́в Авраа́мие, моща́ми твои́ми святы́ми в хра́ме се́м почива́яй, ве́руем несомне́нно, я́ко и ду́хом твои́м не отлуча́ешися от на́с недосто́йных, честну́ю ра́ку твою́ с любо́вию обстоя́щих и Христу́ благода́рне зову́щих: Аллилу́иа.
И́кос 8.
Ве́сь в вы́шних еси́, свя́тче Бо́жий, во све́тлости святы́х торжеству́еши и наслажда́ешися неизрече́нных бла́г небе́сных; ве́мы же, я́ко и на́с земны́х и пе́рстных не забыва́еши, но от го́рних высо́т ми́лостивно к на́м приника́еши, подвиза́я на́с че́ствовати тя́ си́ми похвала́ми:
Ра́дуйся, благоче́стия утвержде́ние; ра́дуйся, правосла́вия похвало́.
Ра́дуйся, земли́ Росси́йския благода́тное осене́ние; ра́дуйся, гра́да Влади́мира све́тлое ра́дование.
Ра́дуйся, многострада́льная розго́ виногра́да Христо́ва; ра́дуйся, граждани́не го́рняго гра́да, Иерусали́ма Небе́снаго.
Ра́дуйся, в пресла́вном му́ченическом ли́це пребыва́яй; ра́дуйся, рая́ жи́телю всеблаже́нный.
Ра́дуйся, Ца́рствия Христо́ва насле́дниче; ра́дуйся, ве́чныя блаже́нныя жи́зни соприча́стниче.
Ра́дуйся, прибе́жище на́ше и защище́ние; ра́дуйся, ско́рое и безме́здное неду́гов врачева́ние.
Ра́дуйся, му́чениче и чудотво́рче Авраа́мие.
Конда́к 9.
Вси́ А́нгели Небе́снии восприя́ша тя́ ра́достно во оби́тели ра́йския, страда́льче богому́дре Авраа́мие, иде́же свята́я твоя́ душа́, огне́м страда́ния искуше́нная, по́честь побе́дную восприя́т от Христа́ Бо́га на́шего, пра́веднаго мздовоздая́теля подвиза́ющихся за и́мя Его́ свято́е на земли́; прославля́я бо и́х на Небеси́, с Го́рними во́и у Престо́ла Своего́ предстоя́ния сподобля́ет, иде́же пое́тся Ему́ немо́лчная пе́снь: Аллилу́иа.
И́кос 9.
Вити́йством злочести́вым и прельще́нием лука́вым неуловле́н пребы́л еси́, страстоте́рпче, изво́ливый па́че умре́ти, не́же Христа́ и ве́ры в Него́ святы́я отрещи́ся, те́мже, я́ко до́бляго испове́дника Христо́ва, ублажа́ем тя́ и зове́м:
Ра́дуйся, пречу́дное му́жество яви́вый; ра́дуйся, я́ко просвеще́н бы́л еси́ заре́ю Пресвята́го Ду́ха.
Ра́дуйся, я́ко стра́х малоду́шный от себе́ отря́сл еси́; ра́дуйся, я́ко щито́м ве́ры огради́лся еси́.
Ра́дуйся, неумолка́ющий благове́стниче си́лы Бо́жия, в не́мощи челове́честей соверша́ющияся; ра́дуйся, и́стинный покло́нниче, ду́хом и и́стиною кла́няяйся Творцу́.
Ра́дуйся, му́жу жела́ний духо́вных, взыска́вый Христа́ в стране́ нече́стия магоме́това; ра́дуйся, отри́нувый богопроти́вную о́ную пре́лесть.
Ра́дуйся, ку́плю де́явый вре́менную, вку́пе же и ве́чную, небе́сную; ра́дуйся, стра́нники и ни́щия пита́вый от трудо́в твои́х пра́ведных.
Ра́дуйся, еле́ем ми́лости умаще́нная главо́; ра́дуйся, горо́ доброде́телей, ороше́нная кро́ве страда́льческия излия́нием.
Ра́дуйся, му́чениче и чудотво́рче Авраа́мие.
Конда́к 10.
Спасти́ся на́м преи́скренне жела́я, мо́лишися за на́с горе́ у Престо́ла Бо́жия, страда́льче Христо́в Авраа́мие, и твои́ми моли́твами посо́бствуеши на́м в стра́нствии многотру́днем земна́го жития́, е́же в покая́нии и благоче́стии сконча́ти, да сподо́бимся с тобо́ю воспева́ти Христу́ и Бо́гу на́шему: Аллилу́иа.
И́кос 10.
Сте́ну защище́ния стяжа́вше твоя́ святы́я моли́твы, Авраа́мие чу́дне, ра́дуемся гре́шнии и чте́м любо́вию па́мять твоего́ усекнове́ния и моще́й твои́х святы́х пренесе́ния, зову́ще:
Ра́дуйся, великоимени́тый на́ш засту́пниче; ра́дуйся, небожи́телю богопросвеще́нный.
Ра́дуйся, чудотво́рче ди́вный и ми́лостивый; ра́дуйся, благи́й послу́шателю су́щих в ско́рбех.
Ра́дуйся, предваря́яй проше́ния призыва́ющих тя́ в беда́х; ра́дуйся, гре́шных ко исправле́нию приведе́ние.
Ра́дуйся, ми́ро враче́бное неду́гом многоразли́чным; ра́дуйся, не то́кмо теле́сных, но и душе́вных боле́зней изря́дный цели́телю.
Ра́дуйся, духо́в нечи́стых от челове́ков прогони́телю; ра́дуйся, даро́в благода́тных незави́стный пода́телю.
Ра́дуйся, благоуха́нием моще́й твои́х услажда́яй ду́ши на́ша; ра́дуйся, чудесы́ твои́ми утвержда́яй на́с во и́стине святы́я правосла́вныя ве́ры.
Ра́дуйся, му́чениче и чудотво́рче Авраа́мие.
Конда́к 11.
Пе́ние моле́бное и похвалу́ сию́ смире́нную не пре́зри, му́чениче; се́ бо ве́рою и любо́вию к тебе́ подвиза́еми, ра́ку моще́й твои́х собо́рне обстоя́ще, ублажа́ем тя́, засту́пника на́шего, и мо́лимся: моли́ся за ны́ вы́ну ко Го́споду, ве́мы бо к Нему́ твое́ невозбра́нное дерзнове́ние и твои́х моли́тв благода́тное де́йство. Иму́ще такова́го предста́теля, благода́рно зове́м ди́вному во святы́х Свои́х Бо́гу на́шему: Аллилу́иа.
И́кос 11.
Светоно́сным Тро́ическим сия́нием горе́ осия́нный, Авраа́мие свя́те, озари́ на́ша сердца́, тьмо́ю грехо́вною покрове́нная; да еле́ем благи́х де́л возже́гши уга́сшия свети́льники на́ша, сподо́бимся бра́чнаго Христо́ва черто́га, иде́же ты́ вселя́ешися со святы́ми и слы́шиши сия́ от на́с благохвале́ния:
Ра́дуйся, Бо́гом да́нный покрови́телю на́ш; ра́дуйся, ангелоподо́бный челове́че.
Ра́дуйся, нищелю́бче благослове́нный; ра́дуйся, странноприи́мниче, дре́внему о́ному пра́отцу Авраа́му уподобля́яйся.
Ра́дуйся, я́ко рука́ твоя́ изоби́льно помога́ше нужда́ющимся; ра́дуйся, я́ко му́дре расточа́л еси́ бога́тство тле́нное.
Ра́дуйся, о́ное премени́вый на нетле́нныя небе́сныя бла́га; ра́дуйся, наслажда́яйся блаже́нства ми́лостивых.
Ра́дуйся, предстоя́й А́гнцу Бо́жию в ли́це му́ченичестем; ра́дуйся, ликовству́яй в селе́нии пра́ведных.
Ра́дуйся, во страда́нии твое́м до́блесть чу́дную яви́вый; ра́дуйся, я́звы Го́спода Иису́са Христа́ на те́ле твое́м носи́вый.
Ра́дуйся, му́чениче и чудотво́рче Авраа́мие.
Конда́к 12.
Благода́ть и ми́лость испроси́ на́м у Христа́ и Бо́га на́шего, святы́й и сла́вный страстоте́рпче Авраа́мие; ве́руем бо несомне́нно, я́ко е́же про́сиши, да́рует ти́ всеблаги́й Влады́ка; те́мже и о на́с гре́шных умоля́ти не преста́й Его́ благоутро́бие и испроси́ на́м да́р коему́ждо благопотре́бен, да зове́м все́х благи́х вино́внику и даропода́телю Бо́гу: Аллилу́иа.
И́кос 12.
Пое́м твою́ страда́льческую кончи́ну, сла́вим твои́х честны́х моще́й от бо́лгар во Влади́мир пренесе́ние, от ни́хже то́ки чуде́с источа́еши непреста́нно, подвиза́я зва́ти тебе́:
Ра́дуйся, Арха́нгелов и А́нгелов сослужи́телю; ра́дуйся, патриа́рхов и проро́ков спредстоя́телю.
Ра́дуйся, апо́столов единоревни́телю; ра́дуйся, му́чеников красото́.
Ра́дуйся, святи́телей и преподо́бных собесе́дниче; ра́дуйся, пра́ведных и все́х святы́х сожи́телю.
Ра́дуйся, я́ко свы́ше чуде́с дея́нии украси́лся еси́; ра́дуйся, в честны́х и многоцеле́бных моще́х свои́х вы́ну с на́ми пребыва́яй.
Ра́дуйся, о́ными пресла́вно чудоде́йствуяй; ра́дуйся, отра́до на́ша и в ско́рбех утеше́ние.
Ра́дуйся, неду́гующих исцеле́ние; ра́дуйся, согреша́ющих исправле́ние.
Ра́дуйся, му́чениче и чудотво́рче Авраа́мие.
Конда́к 13.
Опресла́вный страстоте́рпче Христо́в Авраа́мие, ми́лостиво прие́мши сие́ ма́лое моле́ние на́ше, умоли́ Царя́ ца́рствующих и Го́спода госпо́дствующих, Христа́ Бо́га на́шего, изба́вити на́с от вся́кия ско́рби и ну́жды в жи́зни се́й и муче́ний ве́чных по сконча́нии на́шем, да сподо́бимся в Ца́рствии Небе́снем вку́пе с тобо́ю пе́ти Ему́: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
А́нгелов сожи́тель и челове́ков засту́пник вои́стину яви́лся еси́, му́чениче достохва́льне, благоволе́нием все́х Творца́ Христа́ Бо́га, Его́же возлюби́л еси́ и за Него́ же пострада́л еси́ да́же до кро́ве во испове́дании непоколеби́мем. Те́мже приими́ от на́с сия́ хвале́ния:
Ра́дуйся, звездо́ пресве́тлая благоче́стия; ра́дуйся, свети́ло, во тме́ нече́стия пресла́вно возсия́вшее.
Ра́дуйся, злове́рия магоме́това обличи́телю; ра́дуйся, ве́ры христиа́нския небоя́зненный пропове́дниче.
Ра́дуйся, Ева́нгельскаго уче́ния до́брый послу́шателю; ра́дуйся, зако́на Госпо́дня тепле́йший храни́телю.
Ра́дуйся, ку́плю вре́менную премени́вый на стяжа́ние ве́чное небе́сное; ра́дуйся, ве́ры Христо́вы би́сер многоце́нен стяжа́вый.
Ра́дуйся, Христо́вым уче́нием ду́шу твою́ просвети́вый; ра́дуйся, удосто́ивыйся благода́тнаго осене́ния свы́ше.
Ра́дуйся, яви́выйся доброде́телей жили́ще, преукра́шенное чистото́ю; ра́дуйся, Ду́ха Свята́го оби́тель прекра́сная.
Ра́дуйся, му́чениче и чудотво́рче Авраа́мие.
Конда́к 1.
Избра́нный страстоте́рпче Христо́в и чудотво́рче преди́вный, во страда́нии твое́м вене́ц прие́мый от руки́ Вседержи́теля и со а́нгелы предстоя́й Его́ престо́лу, пе́сньми восхваля́ем тя́ любо́вию и мо́лим ти́ ся́, моли́твами твои́ми от вся́ких бе́д и скорбе́й свобожда́й на́с, тебе́ зову́щих:
Ра́дуйся, му́чениче и чудотво́рче Авраа́мие.
Моли́тва Авраамие.
Святы́й му́чениче Авраа́мие, до́блий во́ине Христа́ Царя́ Небе́снаго, в ско́рбех и напа́стех пресла́вный на́ш помо́щниче и защи́тниче! Ничто́же возмо́же отлучи́ти тя́ от любве́ ко Го́споду Иису́су: ни ле́стныя обеща́ния бла́г вре́менных, ни преще́ния, ни му́ки от злы́х враго́в святе́йшия Христо́вы ве́ры; ты́, я́ко ле́в, изше́л еси́ на бра́нь проти́ву волко́в мы́сленных, духо́в зло́бы, подви́гших на тя́, ра́ди до́браго твоего́ испове́дания, единоплеме́нный тебе́ наро́д бо́лгарский, и, я́ко о́гненная стрела́, те́х порази́л еси́ си́лою благода́ти Свята́го Ду́ха, и кре́пкия, я́ко сме́рть, любве́ твоея́ к Бо́гу. А́ще и пролия́л еси́ кро́вь твою́ за Христа́ Бо́га на́шего, погуби́в вре́менную жи́знь, оба́че безсме́ртною душе́ю, я́ко оре́л, воспари́л еси́ в го́рния оби́тели Отца́ на́шего, насле́довав та́м ве́чную жи́знь, сла́ву и блаже́нство неизрече́нное, и оста́вив на́м нетле́нныя мо́щи твоя́, я́ко кри́н многоце́нный и благоуха́нный. Ве́руем, страстоте́рпче святы́й, я́ко предстоя́ со а́нгелы и все́ми святы́ми Престо́лу Сла́вы Триипоста́снаго Бо́га, усе́рдныя и богоприя́тныя возно́сиши моли́твы не то́кмо о на́с, о святе́й оби́тели се́й и гра́де на́шем, но и о все́й святе́й Христо́вей Це́ркви и о правосла́вней Ру́сской держа́ве. Ве́руем, пресла́вный чудотво́рче, я́ко ты́, си́лою всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние все́м с ве́рою к тебе́ притека́ющим, наипа́че же испра́шиваеши кончи́ну с покая́нием тебе́ чту́щим, и благосе́рдно помога́еши немощны́м младе́нцем, да вси́ от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Те́м же ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя́, до́брый на Небеси́ на́ш моли́твенниче и засту́пниче, помога́й на́м гре́шным и смире́нным твои́ми моли́твами во все́х ско́рбех, ну́ждах и обстоя́ниих на́ших, сохраня́й на́с, святу́ю оби́тель сию́ и гра́д се́й от вся́каго зла́ и вся́кия напа́сти, наипа́че же споспешеству́й ве́чному спасе́нию на́шему и все́х прося́щих от тебе́ по́мощи и заступле́ния. Е́й, смире́нно мо́лим тя́, уго́дниче Бо́жий, моли́ Христа́ Бо́га на́шего, да да́ст О́н ми́р и тишину́ все́м правосла́вным христиа́ном и да отврати́т от на́с вся́кий гне́в, на ны́ дви́жимый, да изба́вит на́с от сете́й вра́жиих, томле́ния во у́зах греха́ и муче́ний а́довых, и да сподо́бит на́с недосто́йных одесну́ю Себе́ ста́ти на суде́ Свое́м пра́веднем и вни́ти в ве́чный поко́й святы́х Его́, иде́же пра́зднующих гла́с непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми прославля́ти Отца́ и Сы́на и Свята́го Ду́ха, Тро́ицу Единосу́щную и Неразде́льную. Ами́нь.